Os produtores da Reserva de Biosfera Mariñas Coruñesas e Terras do Mandeo continúan destacando a nivel España. Adegas Bordel, de Abegondo, que xa dispón do selo de Mariñas Coruñesas acaba de lograr a autorización do Ministerio para a Transición Ecolóxica para integrarse na marca de Reservas de Biosfera Españolas.
Súmase así a Adegas Rilo, situada en Bergondo, que en febreiro obtivo tamén a distinción. Isto referenda o nivel crecente de procura da calidade alimentaria que demostran os produtores do territorio
É unha das primeiras produtoras de viño que obtén este selo de calidade a nivel de España e a sétima empresa galega -todas de Mariñas Coruñesas- que logra a licenza estatal.
A pequena adega, situada en Sarandós, naceu en 2018. Xosé Antonio Meixide Fernández, coñecido como Tonecho, combina a súa devoción pola viticultura co ensino, que exerce no Centro de Formación e Experimentación Agroforestal de Guísamo. A produción do é principalmente de branco lexítimo e tamén algo de Godello, Agudelo e Mencía.
O presidente da Reserva, José Antonio Santiso, desprazouse o venres 30 de abril ata a adega para entregar o distintivo aos seus propietarios. Destacou que o selo de calidade é “ unha mostra clara de saber traballar e dá paixón polo viño” dos responsables da empresa.
“Queremos seguir aproveitando ou enorme potencial autóctono que temos para xerar cada vez máis oportunidades de crecemento e emprego”, afirmou.
Xunto con Adegas Bordel xa dispoñen do selo de Reservas de Biosfera Españolas as seguintes empresas: Orballo, dedicada a plantas aromáticas; As Camposeiras, a marmeladas e conservas de froita; Cheiro e Sabor, a hortalizas e froitas frescas; Daterra do país, a patacas e cebolas; Acastrexa, con concesión de marmeladas, mel e producións vexetais transformadas; e Adegas Rilo, de viño.
