O Club de Ecoturismo de España incorporou a 41 empresas de agroalimentación e hostalería da comarca, a través da Reserva de Biosfera Mariñas Coruñesas e Terras do Mandeo que, como xestora do destino, celebra que acaba de lograr a certificación en calidade e a integración destas iniciativas. As empresas contarán co distintivo de Son Ecoturista.
Este selo engádese aos distintivos que acaban de recibir tamén correspondentes á marca de calidade da Reserva e o certificado de calidade turística do Estado. “Unha tripla certificación de calidade que puideron obter na formación impulsada por Mariñas Coruñesas, pioneira a nivel España en conxugar os tres distintivos”, destaca a dirección da reserva, declarada pola Unesco en 2013. “A Reserva é o único destino de Galicia con certificación en ecoturismo e por iso pode ofrecer esta opción, baseada no protagonismo da sustentabilidade e as empresas locais”, explican os responsables de Mariñas Coruñesas e Terras do Mandeo. “O ecoturismo defínese como a viaxe a unha área natural á vez que se contribúe á súa conservación e desenvolvemento, o que encaixa nos principios da Reserva de Biosfera”, apuntan.
Os emprendedores participaron nun encontro telemático cos responsables estatais para coñecer as vantaxes e os servizos que poderán ofrecer aos clientes grazas a obter a súa marca de ecoturismo. Á reunión asistiu tamén o presidente da reserva coruñesa, José Antonio Santiso.
Os responsables das empresas que obtiveron a distinción estatal puideron conversar co representante da Secretaría de Estado para o Turismo, Ricardo Blanco; e coa xerente do Club de Ecoturismo, Amanda Guzmán. Os emprendedores puideron coñecer ideas e fórmulas para expor as súas experiencias en Mariñas Coruñesas.
“A suma de esforzos é unha oportunidade. Por exemplo, unha iniciativa podería unir unha experiencia gastronómica cunha visita á produtora local do devandito menú e un roteiro polas súas plantacións”, sinala a reserva.
Santiso apunta que “os pasos que se realizan a nivel turístico son moi importantes ao lograr unha implicación cada vez maior das empresas locais”. “Avogamos por un turismo desestacionalizado e baseado en potenciar as bondades do territorio”, asegura o presidente, “convencido” do potencial que ten o territorio que abarca a Reserva como foco de interese turístico.
O responsable incide tamén en “o traballo duro levado a cabo estes meses polo sector para impulsar esta oportunidade ante estes duros momentos que supón a pandemia”. Mariñas Coruñesas agradece a colaboración por parte de Turismo de Galicia e da Deputación “para levar a cabo todo este proceso”.
